Sekretaria Estadu Kultura - Timor-Leste

Haksolok mai iha pájina internet Sekretaria Estadu Kultura nian. Iha pájina ida ne’e bele hetan informasaun kona-ba servisu hotu ne’ebé mak Sekretaria Estadu ida ne’e no Diresaun Nasionál Kultura nian hala’o hanesan entidade nebé hela iha Ministério Edukasaun RDTL nia laran.

Ami nia ekipa, servisu lor-loron hodi fó hatene bá ema hotu kona-ba kultura Timor-Leste nian, hodi haktuir misaun ida hosi prgrama IV Governu Konstitusionál nia ne’ebé hatete “lori cultura hodi servisu atu hametin Nasaun no Estadu Timor nian”. Meiu ida ne’ebé agora ami fo ba públiku ne’e hanesan hakat ida tan bá oin hodi bele hametin ita Timor oan hotu nia hakarak, hakarak atu harí identidade nasional nasaun Timor-Leste nian.

Pájina ida né fahe bá iha seksaun hat: ajenda no notisia sira kona-ba atividade kultura nian sira ne’ebé hala’o tiha ona no sira ne’ebé hanoin atu hala’o; dokumentasaun iha formatu fixeiru ne’ebé bele rai nó formatu pdf ho publikasaun, legislasaun no formuláriu sira; seksaun ida sei fó informasaun institusionál kona-ba Sekretaria Estado Kultura no Diresaun Nasionál Kultura. Pájina sira ne’e hotu sei fó sai iha lian tetun, lian portugés (hanesan ita nia lian ofisiál) nó mós hó lian inglés.

Hodi pájina internet Sekretaria Estadu Kultura nian ne’e bele funsiona duni hanesan instrumentu ida hodi habelar cultura timor nian, ami sei hein imi hotu nia apoio no ami fo sai ba publiku tomak hanesan desafio ida hodi bele kontaktu ho ami nó haruka mai ami informasaun kona-ba eventu kulturál ruma mak atu hala’o ká hala’o tiha ona, hanesan mós bele haruka hosi pdf artigu sira nebe imi hakerek, publikasaun sira, foto sira nó seluk tan kona-ba Timor-Leste. Hosi ami nia parte ami sei esforsa an hodi pájina ida ne’e bele atualizadu nafatin no sai hanesan fatin hasoru malu entre timor oan hotu no ho sira ne’ebé iha interese atu harí Timor-Leste hanesan país ida ne’ebé próspero, dezennvolvidu no ho diversidade kultura!